How to listen to English. ازاي اسمع إنجلش

عشر طرق للاستماع الصحيح للغة الإنجليزية

لما تروح تسأل حد عن إزاي بدأ رحلته العملاقة في تعلم اللغة الإنجليزية أو أي لغة تانية.

تلاقي الرد المعتاد

.اسمع كتير ي معلم

بس في الحقيقة مافيش حد كان بيقول لينا إزاي نسمع؟

وتروح وتسمع و في النهاية تلاقي النتيجة مش قد كدة!

فعشان كدة قررت إن شاء الله أركز على بعض من النقاط اللي تساعدنا كلنا إننا نسمع بشكل كويس.

أولا بيتسمع ليه ؟

لازم تكون عارف أنت بتسمع ليه ؟

هل أنت بتسمع عشان أنت عايز تتعلم و لا عايز تسمع عشان الرفاهية.

و دي نقطة مهمة جداً لإن كتير جداً بيقوا عندهم وهم إن هما لما يسمعوا أفلام و مسلسلات و برامج و توك شو يبقي معنى كدة إنه بقى طليق اللسان في اللغة. والكلام ده غلط تمام .

لإنه في الواقع بيسمع علشان الرفاهية.

ثانيا اسمع علشان تتعلم

عايزك و أنت بتسمع تسمع عشان تنمي مهارة الاستماع .

أيوة بالضبط زي ما سمعت تنمي مهارة الاستماع

يعني مش عايز تركيزك يكون منصب حول الاحداث.

وسايب اللغة بعيدة عنك و تفضل مركز في الترجمة العربي عشان تفهم الأحداث.

لو أنت كدة يبقي أنت بتسمع عشان الرفاهية مش عشان تنمي مهارة الاستماع.

على فكرة أنا كنت واحد من ضمن الناس اللي ضيعت وقت كتير في الاستماع من أجل الرفاهية.

ثالثاً: حدد مستواك

شوف مستوى نفسك

عايزك في المرحلة دي تبدأ تحدد مستوى نفسك بنفسك في الاستماع

بصدق ووضوح من غير ما تضحك على نفسك.

هل أنت لسه في البداية أو متوسط أو متقدم

لأن كل مستوى من دول بيكون ليه طريقة معينة وأسلوب معين.

يعني لو أنت مبتدئ: فأنت كدة محتاج تبدأ بالكرتون وأفلام animation ودي أفضل طريقة هتخلي الأذن تتعود على اللغة.

أصعب حاجة في المرحلة دي وخصوصاً لو أنت كبير هو إنك تقول لاء مش بتفرج على كرتون
و تقول لاء أنا كبير و عايز أتفرج على أفلام للناس الكبيرة كدة الناس هتضحك عليا و يقولوا عليا لسة صغير.

ولو أنت بتفكر بالطريقة دي وبتكون مستعجل النتيجة. يبقي صعب إنك تتعلم لغة. اللغة محتاجة صبر.

أما لو أنت متوسط، فأنت كدة بدأت في مرحلة الأغاني وبرامج التوك شو الكوميدية.

وأنصح بالبرامج الأمريكية لأن من السهل أنك تتفاعل معها بخلاف البرامج البريطانية اللي مبيدوش تعبير على وشوشهم . لأن هما بيقدموا نوع صعب شوية من أنواع الكوميدية اسمه dark comedy.

أما لو أنت متقدم،

فدي مرحلة المسلسلات وأفلام الأكشن والغموض و dark comedy و أكيد طبعاً المسلسلات و يا سلام بقى لو دخلت على الأفلام الوثائقية. لأن الأفلام الوثائقية هتعلمك مصطلحات وأساليب كويسة وكمان أسلوب اللغة فيها عالي.

رابعاً : قلل سرعة الفيديو

قلل من سرعة الفيديو وأنت بتسمع

هنا ممكن أجاوب وأنا مرتاح على أكثر سؤال الناس بتسالة لما تبدأ تسمع وهو ليه الأجانب بيتكلموا بسرعة؟

و الإجابة هنا ي صديقي إن هما بيتكلموا بشكل طبيعي. المشكلة إن الأذن مش متعودة إن هي تسمع بالسرعة اللي هما بيتكلموا بيها! طب أية الحل؟

الحل إن أنت لازم تعمل تمارين للأذن!

طب إزاي؟!

أنا عايزك تسمع أي فيديو على سرعة أقل من سرعته العادية.

يعنى لو أنت بتسمع على سرعة 100% كدة أنت بتسمع على السرعة الطبيعية للأجانب. فتحس إنك مش فاهم حاجة. أو تقول الرد المعتاد هما بيتكلموا بسرعة.

فلما تقلل السرعة مثلاً إلى 75% يبقى أنت كدة بتعمل تدريب للأذن بطريقة صحيحة.

هتفضل تسمع على سرعة 75% لحد ما تحس إن السرعة دي أصبحت كويسة ومناسبة معاك أو أنك أدربت عليها خلاص و قادر أنك تتدخل على 100%.

خامساً: فيديوهات بترجمة إنجليزي

شوف فيديوهات فيها ترجمة إنجلش و أقرأ وأنت بتسمع كدة أنت بٌدرب أكتر من حاسة ( السمع و البصر) و دي طريقة فعالة جداً. وتلاقي الميزة دي في فيديوهات اليوتيوب و كمان ممكن تتفرج على أفلام أجنبي بترجمة إنجلش أو أفلام وثائقية.

سادساً: افهم

اسمع سطر سطر وافهم قبل ما تتنقل على السطر اللي بعده. وي سلام لو معاك ورقة وقلم وتكتب الكلمات والمصطلحات الجديدة اللي هتلاقيها. هتبقي حاجة جامدة جداً.

سابعاً :

بعد ما تعمل كدة يبقي أنت كدة تسمع الفيديو تاني بس المرة دي من غير ما تشوف ترجمة. بالطريقة دي أنت بتضمن لنفسك إنك فهمت الفيديو وكمان هتكون سعيد جداً لو فهمت الفيديو بنسبة 80% أو 70% و دة حافز مهم أنك تكمل.

عايز أعرفك حاجة أنت ممكن تشتغل في فيديو واحد أسبوع كامل. حط في دماغك الجودة أهم من الكم. المشكلة مش مشكلة عدد الفيديوهات. المشكلة هنا استفدت أية من الفيديوهات.

ثامناً: مواقع الاستماع

دول مواقع للاستماع و هتلاقي فيهم مواضيع كويسة و مفيدة.